Lipjan, 20 nëntor 2023 – Në kuadër të programit për barazi gjinore, YAHR organizoi një tryezë diskutimi me temën: “Dhuna dhe abuzimet ndaj grave”. Ky aktivitet i rëndësishëm përfshiu pjesëmarrës nga institucione të ndryshme lokale dhe përfaqësues të shoqërisë civile nga Komuna e Lipjanit, duke shërbyer si një platformë për të adresuar dhe diskutuar çështjet e dhunës ndaj grave.
Gjatë tryezës, diskutimet u përqendruan në mënyra për të rritur vetëdijen tek qytetarët në lidhje me raportimin e abuzimeve dhe për të krijuar një bashkëpunim më të ngushtë ndërinstitucional për parandalimin e dhunës ndaj grave. Qëllimi ishte që të forcohet ndërgjegjësimi dhe të promovohet një reagim më efikas ndaj këtij fenomeni të dhimbshëm.
Rekomandimet kryesore nga tryeza ishin:
- Vetëdijesim i Qytetarëve: Të punohet në rritjen e vetëdijes tek qytetarët për të raportuar rastet e abuzimit në mënyrë zyrtare dhe për të nënvizuar rëndësinë e kësaj veprime.
- Analiza në Aspektin Gjinor: Të bëhet një analizë e thelluar për të kuptuar se nga buron dhuna ndaj grave dhe si mund të adresohen faktorët që kontribuojnë në këtë fenomen.
- Formimi i Fondit Emergjent: Të krijohet një fond emergjent për mbështetje të viktimave të dhunës në familje, që të ofrojë ndihmë të menjëhershme dhe të nevojshme për ato që kanë nevojë.
- Memorandum Bashkëpunimi: Të përpilohet një memorandum bashkëpunimi ndërmjet institucioneve dhe bizneseve për të ofruar mundësi punësimi për personat që kanë përjetuar dhunë në familje.
- Subvencionimi i Qirasë: Të bëhet subvencionimi i qirasë për strehim të viktimave të dhunës në familje, për të ndihmuar në sigurinë dhe stabilitetin e tyre.
- Strehimi i Përkohshëm: Të shqyrtohen mundësitë për ndarjen e disa banesave, si asete të komunës së Lipjanit, që të përdoren si strehim të përkohshëm për viktimat e dhunës.
Ky aktivitet i mbështetur nga Fondi i Grave të Kosovës dhe Kosova Women’s Network, me përkrahjen financiare të Agjencisë Austriake për Zhvillim (ADA) dhe bashkëfinancim të Agjencisë Suedeze për Bashkëpunim dhe Zhvillim Ndërkombëtar (Sida), shënoi një hap të rëndësishëm në adresimin e dhunës ndaj grave dhe në forcimin e mekanizmave për mbrojtjen e viktimave.
Pjesëmarrësit e kësaj tryeze i shprehën angazhimin e tyre për të punuar së bashku në realizimin e rekomandimeve dhe për të kontribuar në ndërtimin e një shoqërie më të drejtë dhe më të sigurt për të gjitha gratë dhe vajzat.
