Një informacion i rremë mund të shpërndahet me një klikim, por pasojat e tij mund të zgjasin shumë më tepër. Në një hapësirë digjitale ku informacioni qarkullon çdo ditë me shpejtësi, aftësia për të dalluar të vërtetën nga dezinformata është bërë më e rëndësishme se kurrë. Pikërisht për këtë u diskutua në aktivitetin “Njohja dhe Mbrojtja nga Plasimi i Lajmeve të Rreme”.

Gjatë aktivitetit, pjesëmarrësit u njohën me ndikimin që lajmet e rreme dhe dezinformatat mund të kenë në individë dhe në shoqëri, si dhe me mënyrat konkrete për t’i identifikuar ato. Një vëmendje e veçantë iu kushtua verifikimit të burimeve, kontrollimit të informacionit para shpërndarjes dhe rëndësisë së mendimit kritik gjatë konsumimit të përmbajtjeve online.

Përmes diskutimeve interaktive dhe shembujve praktikë, të rinjtë patën mundësi të analizojnë situata të ndryshme dhe të reflektojnë mbi mënyrën se si një informacion i pakonfirmuar mund të shndërrohet në dezinformatë dhe të përhapet me shpejtësi në rrjetet sociale.

Aktiviteti synoi t’i pajisë të rinjtë me njohuri dhe shkathtësi praktike që do t’i ndihmojnë të jenë më të kujdesshëm para se të besojnë, komentojnë apo shpërndajnë një informacion. Sepse, në epokën digjitale, të mendosh para se të klikosh është një nga format më të rëndësishme të mbrojtjes nga lajmet e rreme.

Përmes këtyre aktiviteteve, të rinjtë fuqizohen për të qenë qytetarë më të informuar, më kritikë dhe më të përgjegjshëm në hapësirën digjitale.

Aktiviteti “Njohja dhe Mbrojtja nga Plasimi i Lajmeve të Rreme” u realizua në kuadër të Planit të Veprimit Rinor Lokal 2025–2027 të Komunës së Lipjanit, i implementuar nga Youth Association for Human Rights (YAHR).