Një ide mund të jetë fillimi i një ndryshimi, por ndryshimi ndodh kur ajo ide shndërrohet në veprim. Me këtë frymë u zhvillua në Rugovë punëtoria dyditore “Vullnetarizmi që Ndryshon Komunitetin”, e cila mblodhi të rinj nga Komuna e Lipjanit për të mësuar, bashkëpunuar dhe zhvilluar ide konkrete për iniciativa vullnetare në komunitetin e tyre.
E organizuar nga Youth Association for Human Rights (YAHR) në kuadër të zbatimit të Planit të Veprimit Rinor Lokal (PVRL) 2025–2027, punëtoria u fokusua në fuqizimin e të rinjve dhe në zhvillimin e aftësive që i ndihmojnë ata të jenë më aktivë në jetën komunitare.
Gjatë dy ditëve, të rinjtë u përfshinë në aktivitete të edukimit joformal, lojëra për ndërtimin e ekipit, sfida bashkëpunimi, diskutime interaktive dhe aktivitete praktike. Përmes tyre, pjesëmarrësit diskutuan mbi rëndësinë e vullnetarizmit, pjesëmarrjes aktive dhe angazhimit qytetar, ndërsa zhvilluan aftësi në komunikim, bashkëpunim, lidership dhe ndërmarrje iniciativash,
Gjatë ditës së dytë, puna u orientua më shumë drejt veprimit konkret. Të rinjtë identifikuan disa nga nevojat dhe sfidat e komunitetit dhe, të ndarë në grupe, hartuan ide për iniciativa vullnetare që mund të realizohen në Komunën e Lipjanit. Përmes prezantimeve kreative, grupet prezantuan zgjidhjet e tyre dhe treguan se si idetë e të rinjve mund të shndërrohen në iniciativa konkrete në shërbim të komunitetit.
Punëtoria u përmbyll me një sesion reflektimi, ku pjesëmarrësit ndanë përvojat dhe mësimet e fituara gjatë këtyre dy ditëve. Në fund u ndanë edhe certifikatat e pjesëmarrjes, ndërsa të rinjtë shprehën gatishmërinë për të vazhduar angazhimin e tyre në aktivitete vullnetare edhe pas përfundimit të punëtorisë.
Dy ditë mësim, bashkëpunim dhe ide – por mbi të gjitha, një hap më shumë drejt të rinjve që nuk presin ndryshimin, por bëhen pjesë e tij.
Punëtoria “Vullnetarizmi që Ndryshon Komunitetin” u organizua nga Youth Association for Human Rights (YAHR) në kuadër të zbatimit të Planit të Veprimit Rinor Lokal (PVRL) 2025–2027 të Komunës së Lipjanit, me synim promovimin e vullnetarizmit, fuqizimin e të rinjve dhe rritjen e pjesëmarrjes së tyre aktive në zhvillimin e komunitetit lokal.