Në Ditën Ndërkombëtare të Rinisë, të rinjtë e Lipjanit nuk u mblodhën vetëm për të folur për sfidat e tyre, por për të propozuar zgjidhje. Përmes diskutimeve me përfaqësues institucionalë, profesionistë dhe njëri-tjetrin, ata ngritën çështje që lidhen me pjesëmarrjen në vendimmarrje, punësimin, zhvillimin profesional dhe mundësitë që ofrohen për të rinjtë në komunë.

Më 12 gusht, u përmbyll Forumi Lokal Rinor – Lipjan 2026, i organizuar nga Youth Association for Human Rights (YAHR) në bashkëpunim me Komunën e Lipjanit, në kuadër të Planit të Veprimit Rinor Lokal 2025–2027.

Forumi mblodhi të rinj, përfaqësues institucionalë dhe profesionistë në një hapësirë të përbashkët diskutimi, ku në qendër ishte një pyetje e drejtpërdrejtë: “Sa po dëgjohet zëri i të rinjve në Lipjan?”

Në panelin me këtë temë morën pjesë z. Diamant Bytyqi, Nënkryetar i Komunës së Lipjanit; z. Astrit Buja, Drejtor për Kulturë, Rini dhe Sport; z. Leutrim Luma, Profesor; znj. Aurita Drenica, Studente; dhe z. Bekim Krasniqi, Drejtor Ekzekutiv i YAHR. Diskutimi u fokusua në përvojat e të rinjve, rolin e institucioneve dhe mënyrat se si pjesëmarrja e të rinjve në proceset vendimmarrëse mund të bëhet më konkrete dhe më kuptimplotë.

Pas panelit, të rinjtë u ndanë në dy grupe punuese, duke kaluar nga diskutimi në identifikimin e sfidave dhe propozimin e zgjidhjeve. Grupi i parë trajtoi temën “Rinia në vendimmarrje – Nga dëgjimi te pjesëmarrja”, ndërsa grupi i dytë u fokusua në “Mundësitë për të rinjtë – Aftësi, punësim dhe zhvillim profesional”.

Përmes punës në grupe dhe diskutimeve të hapura, pjesëmarrësit ndanë përvojat dhe nevojat e tyre dhe propozuan ide konkrete për rritjen e pjesëmarrjes së të rinjve në vendimmarrje, përmirësimin e mundësive për zhvillim profesional dhe krijimin e hapësirave ku të rinjtë mund të kontribuojnë më drejtpërdrejt në zhvillimin e komunitetit.

Rekomandimet e dala nga diskutimet përbëjnë një hap të rëndësishëm drejt një dialogu më të vazhdueshëm ndërmjet të rinjve dhe institucioneve, me synim që zëri i të rinjve të mos mbetet vetëm pjesë e diskutimeve, por të reflektohet edhe në vendimet dhe politikat që ndikojnë në jetën e tyre.

Forumi Lokal Rinor – Lipjan 2026 u organizua nga Youth Association for Human Rights (YAHR) në bashkëpunim me Komunën e Lipjanit, në kuadër të zbatimit të Planit të Veprimit Rinor Lokal 2025–2027, me fokus në fuqizimin e pjesëmarrjes së të rinjve, promovimin e dialogut me institucionet dhe krijimin e më shumë mundësive për zhvillimin e tyre.